Igl auto da posta colligia Andiast cun la reit d'autos da posta naven da Glion e culla Viafier Retica. Dalla sortida dalla via cantunala A19 denter Rueun e Tavanasa porta Vus ina beinmantenida via da muntogna el vitg da Vuorz, a Curtginet tier la staziun da val dallas pendicularas ed ad Andiast. La via ei carrabla cun autos entochen 18 tonnas e 2.5m ladezia.

Sche Vus meis cun la miur sur la carta ora (ed haveis buca deactivau javascript), veseis Vus ina part dils cunfins dalla vischnaunca d’Andiast. Nus supplichein per pazienzia duront cargar, quei maletg ha 70kb.

Naven d’Andiast eis ei mo dus pass tochen allas ruinas dils castials ed allas renomadas frescas dalla baselgia da Vuorz, ed era buca lunsch per ir a Sumvitg sco punct da partenza per la planira aulta dalla Greina e per la caplutta da Zumthor a sogn Benedetg, a Versomi ella Ruinaulta, ella Val Stussavgia romantica e spuretga, a Val s. Pieder cun siu bogn termal, sur il Lucmagn el Tessin (stad ed unviern), a Realp per in viadi cun la viafier a vapur sur il Furca e sper il glatscher dil Rodan ora, ni a Trun, il center dalla cultura grischuna e patria dil pictur artist Alois Carigiet e da siu frar Zarli Carigiet.

Ultra digl agen territori da skis e da snowboard Breil Vuorz Andiast contonschan ins ils territoris da skis dall’Arena alva, Sursaissa/Mundaun, Val s. Pieder, Mustér e Sedrun en 15 tochen 40 minutas.