Nossa vischnaua

Vus essas cheu:  Index > Nossa vischnaunca

Nossa vischnaunca

::: Attracziuns
   

Sper cultura, architectura e divers auters scazis culturals porscha Andiast e la destinaziun da vacanzas Breil Vuorz Andiast era bia variaziun per sport e temps liber. Viandar, ir cun velo da muntogna, cun skis e cun calzers da neiv, dar minigolf, far bogn – per numnar mo enzacons exempels.
 
:: Baselgia parochiala d’Andiast

L’emprema menziun documentada d’ina baselgia ad Andiast datescha da 1491, e quei gia cun il patrocini da s. Giulitta e s. Quiricus, dils quals ins seregorda aunc oz mintg’onn a caschun dalla perdanonza.

Quella baselgia (ni plitost caplutta) ei lu vegnida remplazzada 1707 (consecraziun 1716) dalla baselgia hodierna, prolungida 1939 per 4 m viers vest. Las parts sut dalla tuor, separadas dalla baselgia d’ina fessa da ca. 5 cm e spustadas naven dall’axa principala levamein viers nord, renvieschan a temps medievals temprivs. Eventualmein van ils emprems fastitgs anavos sin la "curtis dominica".

  
 
 
 
:: Senda Sursilvana – il star dallas sendas panoramicas
 
 
 

La Senda Sursilvana da 100 km lunghezia ei ina sfida ed in eveniment. Construida igl onn 1978, va ella naven dil Cuolm d’Ursera entochen a Cuera e meina denter auter era tras il vitg d’Andiast.

La senda panoramica porscha numerusas culminaziuns historic-culturalas ed ins sa far ella en pliras etappas. Ault sur il Rein anteriur, sin la terrassa sulegliva dalla Surselva spassegein nus tras vitgets purils da muntogna, sper uclauns romantics, baghetgs historics, numerusas baselgias e capluttas vi e vegnin en loghens panoramics impressiunonts. La Senda Sursilvana fascinescha ton ils viandonts pretensius sco quels cun paucas experientschas. Dapli informaziuns.

 

:: Lag da fermada da Pigniu e cascadas

La pli gronda profunditad dil lag da fermada da Pigniu munta a 42 meters, el tschaffa 7,3 miu3 aua e sia surfatscha mesira 0,4 km2.

Spassegiond entuorn il bellezia lag da Pigniu savein nus admirar sin la costa dretga las cascadas che sederschan tochen 200 meters ella profunditad.

  
 
 

 

:: Maletg monumental da Suworow
 
 
 

Sin il mir da fermada stat in monument historic singular.

Cun sia pictura gigantica vul igl artist Martin Valär regurdar alla retratga desastrusa dil marschal russ Suworow, il qual ha traversau 1799 cun sia armada il Veptga sin la fugia dall’armada franzosa.

 

:: Temps liber e sport

La regiun da vacanzas Breil Vuorz Andiast cun siu territori da viandar al pei dil Pez Durschin (3421 m) e dil Hausstock (3158 m) ei, viu dallas dimensiuns sco grondezia, canera e traffic, tuttavia buca da cumparegliar cun Tavau, cun l’Arena dallas Alps ni cun Savognin.

La grondezia da questa stupenta regiun da vacanzas ei claramein sia dimensiun surveseivla, ses vitgs muntagnards genuins e la tgira da biars detagls. Ni sco quei ch’ils da Breil Vuorz Andiast han per moda da dir: „pign, mo fin“ – per franc buca lungurus, semplamein senza hectica.

Ina oasa da vacanzas sco strusch in’autra, era concernent ils prezis e surtut per famiglias. Detagls tier tut ils temas sco era informaziuns da pernottaziun anfleis vus silla pagina d’internet dalla regiun da vacanzas Breil Vuorz Andiast.